РАИСИ КУМИТАИ ИДОРАИ ЗАМИНИ НОҲИЯИ ШАҲРИСТОН БА НАФАҚА ГУСЕЛ КАРДА ШУД

Имрӯз дар вазъияти тантанавӣ раиси кумитаи идораи замини ноҳияи Шаҳристони вилояти Суғд Баҳром Ҳамроев, ки аз соли 2018 то инҷониб дар ин вазифаи пурмасъулияти хизмати давлатӣ фаъолият дошт, ба нафақа гусел карда шуд.

Раиси Кумитаи давлатии идораи замин ва геодезии Ҷумҳурии Тоҷикистон Хоҷазода Ориф Ашӯрӣ зимни сухани табрикоти худ қайд намуд, ки Ҳамроев Баҳром Худойқулович аз зумраи кадрҳои ботарҷибаи Кумитаи давлатӣ буда, номбурда пас аз хатми донишгоҳ, шурӯъ аз соли 1982 то ба имрӯз дар соҳаи заминсозӣ, аз ҷумла мансаби раиси кумитаи идораи замини шаҳру ноҳияҳои Истаравшан, Зафаробод, Ҷ.Расулов, Ашт ва Шаҳристон, инчунин дар вазифаи директори корхонаи давлатии фаръии «Бақайдгирии молу мулки ғайриманқул» дар ноҳияи Деваштич фаъолияти пурсамари меҳнатӣ дошт.

Фаъолияти бенуқсони Ҳамроев Б.Ҳ. бо мукофоти давлатӣ – медали «Хизмати шоиста» ва дигар мукофотҳои соҳавӣ қадршиносӣ шудааст.

Зимни суханронӣ Баҳром Ҳамроев барои чунин қадршиносӣ ба Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки маҳз туфайли сиёсати хирадмандонаи Пешвои муаззами миллат барои фаъолият дар ҳамаи соҳаҳо, аз ҷумла соҳаи заминсозӣ шароити мусоиди корӣ фароҳам оварда шуда, шахсоне, ки садоқатмандона меҳнат мекунанд ба таври шоиста қадрдонӣ мешаванд, миннтадории самимӣ баён намуд.